ڪا به اهڙي تنظيم جيڪا ٽن يا ٽن کان وڌيڪ ملڪن تي مشتمل هجي ۽ سندس دائرو قومي مُفادن کان مٿڀرو هُجي، ته ان کي بين الاقوامي تنظيم چيو ويندو آهي. اهڙي تنظيم جيتوڻيڪ گهڻي قدر پاليسيون جوڙڻ تائين محدود هوندي آهي، ڇاڪاڻ ته انتظامي اختيار بهرحال هر رياست جي حُڪومت تائين محدود هوندا آهن. اهڙي طرح ”بين الاقوامي تنظيم“ گهڻي قدر سياسي، سماجي، اقتصادي ۽ امن نافذ ڪندڙ تنظيم هوندي آهي. سندس ميمبر شپ، مالي سگهه، موجودگي ۽ عمل جو دائرو پڌرو هوندو آهي. ان تنظيم جو بنيادي ڪم اڳرائي پسنديءَ يا تڪرار ڀريو هرگز نه هوندو آهي. اهڙي تنظيم هاڪاري طريقي سان بين الاقوامي برادريءَ لاءِ آساني ۽ ايڪي جو ماحول فراهم ڪندي آهي. مثلاً ليگ آف نيشنس ۽ گڏيل قومن جي تنظيم وغيره ٻين لفظن ۾ ته اها دفاعي يا رد عمل ڏيکاريندڙ تنظيم نه هوندي آهي. ان سلسلي ۾ قائم ٿيندڙ ڪجهه معيار هيٺين طرح آهن. 1. عام طور تي اهڙي تنظيم جي ميمبري هر رياست لاءِ کُليل هوندي آهي ۽ ان ۾ نمائندگي ڪندڙن کي ڪنهن نه ڪنهن حُڪومت طرفان اختيار مليل هوندا آهن. 2. هر ميمبر رياست ڪنهن جاگرافيائي، آبادي، ثقافتي يا مالي معيار مطابق نه پر مساوات جي اصول تحت مڃي ويندي آهي. 3. بين الاقوامي تنظيم ڪنهن به ميمبر رياست مٿان پنهنجا شرط زوريءَ نه مڙهي سگهندي آهي ۽ اُها فقط طئه ٿيل سفارشات تي عمل درآمد جي درخواست ڪري سگهندي آهي. 4. بين الاقوامي تنظيم رياستن وچ ۾ تڪرار جو خاتمو مُذاڪرات ۽ ٺاهه ذريعي ڪرائيندي آهي